«SHYGYS AIBYN-2024» облыстық әскери-патриоттық жарысында жеңіске жеткен «Сұңқар» командасы «AIBYN-2024» X халықаралық әскери-патриоттық жастар жиынына аттанды.

Сағадат Нұрмағамбетовтің 100 жылдығына арналған «SHYGYS AIBYN-2024» облыстық әскери-патриоттық жастар жиынында облыстың қалалары мен аудандарынан келген 10 команданың арасынан Алтай ауданының «Сұңқар» командасы топ жарған болатын, деп хабарлайды Altainews.kz тілшісі. 

Облыстың намысын қорғайтын болашақ жас сарбаздарды Қарулы Күштердің өкілдері сәт сапар тілеп, шығарып салды.

«Сұңқар» командасы облыстық «AIBYN» жарысында 2022 және 2023 жылдары жеңіске жетіп,  халықаралық «AIBYN» жарысына екі рет жолдама алған белсенді команда.

Бұл жолы да команда «AIBYN-2024» облыстық жарыстан жеңімпаз атанғаннан кейін, бірден халықаралық жарысқа дайындықтарын бастап кетті. Жас сарбаздар дене шынықтыру, тактикалық және ату жаттығулары, теориялық, психологиялық, алғашқы медициналық көмек және негізгі медициналық дағдыларды үйрету бағыттары бойынша дайындалып, білімдері мен тәжірибелерін, біліктіліктерін шыңдады.

Биыл «AIBYN-2024» халықаралық әскери-патриоттық жиыны Алматы қаласындағы Сағадат Нұрмағамбетов атындағы Құрлық әскерлері Әскери институтының «Әли» оқу орталығында 16-24 маусым аралығында өтеді.