Катонқарағай ауылы аудан орталығы мәртебесіне ие болған соң аталмыш елдімекенде құрылыс жұмыстары ерекше қарқын алып отыр. Сонымен қатар, өңірде кәсіпкерлік, оның ішінде туризм саласы дамып келеді.

Мәселен, Алматы қаласында тұратын Шыңғыстай ауылының тумасы Тілеубек пен жолдасы Ғалия Мұсабаевтардың жеке істерін ашып, туристерге демалатын жайлы орындар салуды бастаған. Алғашқы жылы олар бір-бір отбасына арналған жатын, ас бөлмесі, дәретханасы, душы бар еуропалық A-frame жобалы, сыртқы бейнесі ерекше үш үйді салып алды. Келесі жылы 12 орындық қонақ үйді, асхана мен тандыр нан мен самса пісіретін наубайхананы іске қосты. Қазір кәсіпкерлер тойхана салып, моншаның құрылыс жұмыстарын бітіруге күш жұмылдырған.

Мұсабаевтардың күніне мың дана құмтасблок, брикет шығаратын цехтары бар. Ол құрылыс материалдарын өздері де пайдаланады, өңір тұрғындарына да қолжетімді бағада сатады.

Мұсабаевтардың «Ұлназ» демалыс орнынан Шымкенттен келген бір топ жігітті кездестірдік. Өзін Есенғали деп таныстырған топ жетекшісі Катонқарағайға алғаш келіп тұрғандарын, Мұзтауды, Рахман қайнарын көргілері келетіндерін айтып, табиғатымыздың сұлулығына деген таңданыстарын жасырмады.

Ал, құрылыс маманы, зейнеткер Алтай Имашевтың балалары Құралай мен Құрмет те бір жыл ішінде туристерге арнап ауылдың бас жағында, Сарымсақты өзенінің бойына, у-шудан тыныш, ауасы таза жерге «Алтай» демалыс орнын салып, меймандарға қызмет көрсетуді бастап кетті.

«Жерұйық» мейрамханасының иесі Рафхат Бақатаев та кәсіпкерлікті дамытуға белсене кірісіп, иелігіндегі ескі ғимараттарды жөндеп, іске қосып келеді.

Ауданда құрылыс жұмыстарының қарқынды жүруіне газблок, құмблок, дөңгелек құйма (кольцо) жасау ісін жолға қойған Айдын Тәукенов, ағайынды Ернат, Есбол Абауовтар, Махамбет Кешілбаев, Тілеубек Мұсабаевтардың көмегі зор. Олардың шағын өндірістері арқасында құрылыс салушылар материалдарды сырттан іздеп уақыт жоғалтпайды, артық шығынданбайды.                                                            

                  Жәнібек Қызыр