Оқушылардың жазғы демалысы аяқталып, мектеп табалдырығын аттайтын күн де алыс емес. Жаңа оқу жылының басталуына орай әр өңірде «Мектепке жол» республикалық акциясы өткізіледі.

«Жақсылық жаса» ұранымен ұйымдастырылатын қайырымдылық акциясы 1 тамызда бастау алып, 30 қыркүйекке дейін жалғасады, деп хабарлайды Altainews.kz сайты.

ШҚО білім басқармасы басшысының орынбасары Әлима Ақылбектің айтуынша, облыстың түкпір-түкпірінде бұдан бөлек «Балаларға жақсылық жаса!», «Ауыл балаларына мектепке сыйлықтар», «Отбасы отбасына көмектеседі: Баланы мектепке жинаймыз!» атты қайырымдылық шаралары да өткізіледі.

Айта кету керек, жаңа оқу жылында облыс бойынша 343 мектепке 98 мыңнан астам оқушы барады. 22 мың бала үшін облыстық бюджет қаражатынан материалдық көмек қарастырылған. Биыл оқушыларды қолдауға 4,4 млрд теңге, оның ішінде мектеп формасы мен аяқ киім сатып алу үшін 957,3 млн теңге бөлінген.