– Өңірімізде өндіріс орындары көп, солардың бәріне мамандар қажет. Біз осы кәсіпорындарға техникалық мамандар даярлап келеміз. Президент Қасым-Жомарт Тоқаев Жолауында инженерлік кадрларды дайындауға басымдық беру керектігін міндеттеді. Оның ішінде орман, су шаруашылығы, жалпы техникалық басқа мамандықтар да бар. Біз маман даярлау сапасын арттыруға көңіл бөліп отырмыз. Сондай-ақ, біз «Индустрияға арналған жасанды интеллект» орталығын құрып жатырмыз. Ол үшін бізге Әлемдік банк тарапынан қаражат бөлінді. Бізде жасанды интеллект және цифрлық технологиялар факультеті бар. Биыл «Жасанды интеллект, транспорт және транспорттық техника» атты жаңа білім беру бағдарламасын аштық. Осы бағытта біз көп жұмыс атқарып келеміз.
Жолдауда бізге қойылған мақсаттар өте маңызды. Біз кадрлар сапасын жақсартып, халықаралық стандарттарды енгізу бойынша жұмыс істейміз.
Мемлекет басшысы шетелдік 28 университеттің Қазақстанға келгенін айтты. Оның ішінде біздің университетте де «Лу Бань» шеберханасы ашылды. Осы күзде Қазақ-неміс ғылым және технология институтын құрамыз. Осылайша халықаралық стандарттарды енгізіп, сапаны көтеруіміз керек.
Біз мектептен бастап өз өңіріміздегі және өзге облыстардағы да балалардың инженерлік мамандықтарға деген қызығушылықтарын арттырып, оларды университетке тартуда көп жұмыс атқарып жатырмыз, – деді оқу орнының басшысы.