Өскемендегі №10 жылу магистралінде құбыр жарылуы салдарынан болған облыс орталығының кейбір аудандарын жылумен қамтамасыз ету проблемасы тез арада жойылуда. Бұл туралы диаметрі 630 мм болатын құбырдың жарылу орны анықталған кезде хабарланды. Ақаулық шыққан жерге барлық күш пен мүмкіндіктер жұмылдырылды. Бастысы, барлық қажетті техника мен кәсіби ресурстар қолда бар. Жағдайды облыс әкімі Ермек Көшербаев жедел өз бақылауына алды.

“Мәселенің күрделілігі - жылу магистралінің жарылған тұсын табу болды” дейді мамандар. Ақауды іздеуге көп уақыт кеткен.

“Шығыс Жылу” АҚ техникалық директоры Асхат Бұқатовтың айтуынша, ақаулықты жөндеуге қажетті техника жеткілікті. Аймақ басшысының тікелей бақылауымен құбыр жарылған орынға 5 техника, 20 адам жұмылдырылып, арнайы 3 инженер-техник маман тартылды. 

Айта кетейік, құбыр жарылуы Сәтпаев көшесінде салынып жатқан жаңа сауда орталығының аумағында орын алды. Оқиға орнында барлық қажетті техника мен мамандар жұмыс істеп жатыр.