Биыл Қазақстан адвокатурасы өзінің кәсіби мерекесін осымен екінші рет атап өтуде. Осыған орай, Өскемендегі денешынықтыру-сауықтыру кешенінде ҚР адвокаттары күніне орайластырылған турнир өтті, деп хабарлайды  Altainews.kz  тілшісі.

ШҚО адвокаттар алқасының ұйымдастыруымен өткен спорттық шараға облыстық сот жүйесі, адвокаттар алқасы мен Әділет департаменті, сондай-ақ, ШҚО бойынша сот сараптамалары институты, Абай облысының адвокаттар алқасы, ШҚО нотариалдық палатасы мен заң консультанттарының алқасы, сонымен қоса облыстық жеке сот орындаушылары өңірлік палатасының құрама командалары қатысты.  

Жарысқа қатысушы командалар волейбол, арқан тартыс пен футболдан, яғни спорттың үш түрінен өзара бақ сынасты. Әрбір команда жеңіске жетуге ұмтылып, қызықты әрі тартысты ойын көрсетті. 

Сонымен, сайыстың қорытындысы бойынша, Шығыс Қазақстан облыстық сот жүйесінің құрамасы волейбол мен арқан тартудан үздік деп танылып, I орынды иеленді. Ал футболдан II орынға табан тіреді. Абай облысынан келген адвокаттар алқасының командасы болса, футболдан тамаша өнер көрсетіп, I орынды алды. Волейболдан III орынды қанағат тұтты. Сондай-ақ, ШҚО жеке сот орындаушыларының өңірлік палатасының құрамасы волейболдан II орынға, ал футболдан III орынға лайық деп танылды. Бұған қоса, ШҚО бойынша сот сараптамалары институты арқан тартудан III орын алса, өңірлік адвокаттар алқасының командасы арқан тартудан II орын алды. 

Спорттық шараға барлығы 200-дей спортшы қатысты. Турнир қатысуышыларын әріптестері қолдап, сайысқа түскен командаларға жанкүйер болды.
                                                                                               

Арайлым Орсаринова