Жаңа жыл мерекесі қарсаңында Үлкен Нарын ауданының тұрғындары жаңа баспанаға ие болды. Бұл қуанышты оқиға аудан халқы үшін ерекше сый болды, себебі баспанамен қамту мәселесі көптеген отбасы үшін маңызды,- деп хабарлайды Altainews.kz тілшісі.

2022-2023 жылдар аралығында ауданда 20 жаңа үй салынып, тұрғындарға берілген болатын. Бұл үйлер заманауи талаптарға сай салынып, барлық қажетті инфрақұрылыммен жабдықталған. Аудан әкімдігі тұрғын үй құрылысына басымдық беріп, тұрғындардың баспанаға деген сұранысын қамтамасыз етуді басты міндет етіп қойған.

Осы жылы қосымша 24 бір қабатты үйдің құрылысы толық аяқталып, пайдалануға берілді. Аталған баспаналардың ішінде 5-еуі көпбалалы отбасыларға бөлінді. Бұл отбасылар үшін жаңа үй тек баспана ғана емес, сонымен қатар жаңа өмір бастауға мүмкіндік болды. Ал қалған 19 үй халықтың әлеуметтік әлсіз топтарына, оның ішінде мүмкіндігі шектеулі жандарға, жалғызбасты аналарға және зейнеткерлерге арналған.

Үйлерді тапсыру барысында салтанатты іс-шара ұйымдастырылып, аудан басшылары жаңа тұрғындарды құттықтады.

Жаңа үйлердің құрылысы мемлекет тарапынан көрсетілген қолдаудың арқасында жүзеге асырылды. Жобаны іске асыру үшін бюджеттен қаражат бөлініп, құрылыс сапасына ерекше мән берілді. Тұрғындардың айтуынша, жаңа баспаналар жылы әрі жайлы, ал олардың орналасқан жері күнделікті тұрмысқа өте қолайлы.

Баспана мәселесін шешу Үлкен Нарын ауданы дамуының басты бағыттарының бірі болып қала береді. Алдағы уақытта да аудан басшылығы тұрғындардың жағдайын жақсарту үшін жұмыстарды жалғастыратынын айтты.

Ержан Әбіш