Өңірдегі жылу жүйелері жөнделуде
Алтай, Үлкен Нарын, Глубокое, Ұлан, Күршім және Зайсан аудандарында жылу көздерін жөндеу және жаңғырту жұмыстары белсенді жүргізілуде. Бұл туралы облыстық мәслихаттың кезекті сессиясында айтылды, деп хабарлайды Altainews.kz тілшісі.
Халықты көмірмен қатамасыз ету жоспарға сәйкес орындалуда. Қараша айының соңына дейін көмірмен қамтамасыз ету 85%-ға жетеді.
Жылу мен жөндеуге қыруар қаражат бөлінген аудандар
Ең көп қаражат Катонқарағай ауданы мен Ұлан ауданындағы жылу жүйелерін жаңартуға бөлініп отыр. Катонқарағай ауданында қуаттылығы сағатына 6 гигакалория болатын 2,2 миллиард теңге сомаға жаңа қазандық пайдалануға берілді. Ал Ұлан ауданындағы Қасым Қайсенов кентінде ұзындығы 9 шақырым болатын орамішілік желілер қайта жаңғыртылуда. Жобаның сметалық құны 2,7 миллиард теңгені құрайды. Мұнда биылға жоспарланған 3,5 шақырымның 3 шақырымы жөнделді. Бұл қайта құру жобасы 2025 жылы жалғаспақ.
Жөндеудің жалпы құны 188 миллион теңгені құрады, – деп атап өтті Шығыс Қазақстан облысының Энергетика және тұрғын үй-коммуналдық шаруашылық басқармасы басшысының орынбасары Наурызбай Сармурзин.
Бұқтырма кентіндегі барлық бес қазандық жылыту маусымына дайын. Күршім ауданында 85 миллион теңге жұмсалып, барлық қазандықтар жөнделген. Зайсан ауданында жылыту маусымына дайындық аясында 90 миллион теңгеге Қ.Сәтбаев қазандығына және Серебрянка қаласында төрт қазандықтың үшеуіне ағымдағы жөндеу жүргізілді.
Суық түссе де кей жөндеу жұмыстары жалғасуда
Алтай, Шемонаиха аудандары, Өскемен мен Серебрянка қалаларында жылыту жүйелеріне қатысты жөндеу жұмыстары қарашаның боз қырауы түскенге дейін жалғаспақ.
Шемонаиха ауданында жалпы құны 188,6 миллион теңгені құрайтын 990 метр жылу желілері ауыстырылды. Алайда құбырларды төсеу жұмыстары қара күздің басына дейін созылады.
Сондай-ақ құны 220 миллион теңгені құрайтын Өскемендегі Қ.Сәтбаев даңғылында Халифа Алтай мешітіне қарама-қарсы орналасқан жылу құбырларын қайта жарақтандыру жобасы қараша айының соңына дейін жоспарланған.
Риддердегі жағдай қандай?
Риддер қаласында жылыту маусымы 26 қыркүйекте басталды. Жылуды ерте берудің арқасында жылыту құбырларындағы ақаулар да ерте анықталып, уақтылы оңалтуға мүмкіндік болды. Яғни, 4 қазан күні Риддер қаласындағы 2 коммерциялық нысан мен 17 үй 9 сағатқа жылусыз қалды. Бірақ бұл жергілікті тұрғындарға ешқандай жайсыздық тудырмады. Себебі сыртқы ауа температурасы 18 градусты көрсетіп тұрды.
Сонымен қатар Бақытжан Кәкенқажыұлы Риддерде жылыту маусымына дайындық барысында жылу жолдарының 65 нүктесіне қосымша жөндеу жұмыстары жүргізілгенін атап өтті.
Айта кету керек, өткен жылдан бері Риддер ТЭЦ-інің жөндеу жұмыстарына 86 миллиард теңге бөлінді.
Ақерке Рағызбаева
