Өскеменде XXII халықаралық «Беловодье» орыс дәстүрлі фольклоры фестивалі өтті. Орыс халқының әдебиетін, мәдениетін, дәстүрі мен қолданбалы қолөнер шеберліктерін дәріптеуге келген әнші, хореограф, колөнер шеберлерінен құралған 25 ұжым мен жеке орындаушылар Достық үйі – Қоғамдық келісім орталығында үш күн қатарынан өнер көрсетті.

Фестиваль бағдарламасы аясында көрермен-қонақтар көрші елдің  Новосібір мен Барнаул қалаларынан келген өнерпаздарының концерттік қойылымдарын, халық мәдениеті бойынша шеберлік сабақтарын, қолөнер жәрмеңкесін, орыс этнографиясы туралы көрмені тамашалап, Солжағалау мұражай кешеніндегі шығармашылық кездесулерге, дәстүрлі кешкі ойын-сауықтарға қатысты.

Фестиваль аясында кездескен екі елдің ансамблі фольклорлық ансамбль әдістемесі бойынша шеберлік сабағын өткізіп, дәстүрлі дыбыспен жұмыс істеу ерекшеліктерін талқылады.

XXII халықаралық «Беловодье» фестивалі жергілікті әкімдіктен қолдау тауып, соның арқасында фестивальге қатысушылардың саны мен географиясы кеңейді.

Фестиваль қатысушылары облыс әкімі Ермек Көшербаевтың атынан халықтық өнерді сақтауға  және насихаттауға қосқан үлесі үшін алғыс хаттармен марапатталды.

Қуаныш Рахметоллаұлы,

Ақерке Рағызбаева

Фото: Аяужан Утеулинова