Отбасында ерекше бала дүниеге келгенде, бүкіл өмір 180 градусқа өзгереді. Әрбір ата-ана өз жолын өтіп, баласына ерекше назар мен қамқорлық қажет екенін түсінеді. Бұл жолды Мадина Ауренованың отбасы да өткерді, деп хабарлайды Altainews.kz тілшісі.

Мадина Ауренова үшінші баласы дүниеге келгенге дейін, олардың отбасы басқа жанұялардан көп айырмашылығы болған жоқ екендігін еске алады. Олар жұмыс істеп, үлкен балаларын тәрбиелеп, демалуға да уақыт табатын. Бірақ үшінші баласы дүниеге келген соң, өмірлері түбегейлі өзгерді. 2015 жылы олардың үшінші баласы дүниеге келіп, сегіз айлығында оған ДЦП диагнозы қойылды. Бұл оқиға ата-ананың өмірінде маңызды таңдау жасауға итермеледі: қайғыға беріліп, өмірін тоқтату немесе өмір салтын өзгертіп, баласына және басқа да ерекше балаларға көмектесуге бел буу. Осылайша, Өскеменде ДЦП диагнозы бар балаларға арналған «DEMEU» қайта оңалту және түзету орталығы ашылды.

Үш жыл бойы осы үмітпен шетелдерге, әртүрлі қалаларға барып, клиникалар мен реабилитациялық орталықтарды іздеп жүрді. Осы уақыт ішінде олар Оңтүстік Кореяда, Қытайда, Ресейде, Өзбекстанда, Қырғызстанда және Қазақстанның көптеген қалаларында реабилитация курстарынан өтті.

Осы сапарларға отбасының барлық жинаған ақшасы, туыстары мен достарының көмегі жұмсалды. Бірақ нәтиже болмады. Әр реабилитация курсынан кейін баланың жағдайы сәл жақсарып, ол кішкентай дағдыларды меңгеріп, бірақ курс аяқталған кезде үйге оралғанда, бірнеше күнде қол жеткізген нәтижелер тез ұмытылып, қайтадан бастапқы жағдайға оралуға тура келді.

Ол кезде ол ДЦП диагнозы бар балаларды тәрбиелеп отырған басқа отбасылармен байланыста болған. Осы балаларға көмектесу үшін ата-аналар біріккен түрде Өскеменге маман шақырып, оған пәтер жалдап, сол жерде қабылдау жүргізетін. Бірақ бұл қысқа реабилитация курстары он күннен аспайтын еді – бұл «ақша желге ұшқандай» болды, өйткені шақырылған маман кеткен соң, балалар өз бастапқы күйіне қайта оралатын.

Бірақ орталық ашу үшін ақша керек еді, ал оларды сол кезде табу қиын болды. Осы сәтте мемлекет тарапынан «Бизнестің жол картасы 2020» бағдарламасы аясында үш миллион теңге көлемінде грант алу мүмкіндігі пайда болды. Бұл қаржы жаңа істің бастамасы үшін алғашқы капитал болды.  2019 жылы қайта оңалту және түзету орталығы ашылғанда, басты мәселе шешілді: енді Өскеменде ДЦП диагнозы бар балаларға күнделікті тұрақты реабилитация мүмкіндігі болды, мұнда мамандармен жұмыс үзілмей, балаға кешенді әсер ету арқылы бұрынғы нәтижелер жетілдірілді.

Ақша тапшылығының себебінен орталық 100 шаршы метр жалға алынған ғимаратта ашылды. Мұнда төрт негізгі маманның кабинеттері орналасты: емдік дене шынықтыру бойынша нұсқаушы, логопед, массажист және балалардың ұсақ моторикасын дамытатын эрготерапевт.

Орталық ашылғаннан кейінгі бастапқы кезеңдерде оның жұмысын бүкіл Өскемен естіді, ол жерде тұрақты түрде 60-қа жуық бала сабақ ала бастады. Олардың көбінде ДЦП-ның ауыр түрі анықталған. Балалар тек жүруді емес, кейбіреулері тамақ ішу, басын ұстап тұру, қолмен әртүрлі заттарды ұстау, отыру, қолдарын қажетті бағытта қимылдатуды да білмеді. Осы дағдыларды балалар орталығында үйретеді.

Қазіргі уақытта қайта оңалту және түзету орталығында жүзге жуық бала оқиды, оның отызы күндізгі стационар жағдайында күніне алты сағат бойы мамандармен жұмыс істейді. Нәтижелер бар. Орталықтың бірнеше тәрбиеленушісі коррекциялық мектептерге оқуға түсті. Көптеген балалар отыруды, жүруді, оқу, жазу және санауды үйренді, өзін-өзі күту дағдыларын меңгерді.

Орталық тәрбиеленушілерінің ата-аналарына да үнемі психологиялық қолдау көрсетіледі: оларға кездесулер мен лекциялар, психологиялық жүктемелерден арылту сабақтары мен тренингтер өткізіледі. Барлық күш ата-аналардың «бір орында қалып қалмауына», олардың әрі қарай осы қиын жолмен жүре алуы үшін жұмсалады.

Фото: Мадина Ауренованың жеке мұрағатынан