Өскемен қаласында жаңа жылу электр станциясының (ЖЭО) құрылысы энергетикалық қауіпсіздікті нығайтып, өңірдің экологиялық жағдайын жақсартуға бағытталған маңызды жоба болып отыр.

Қалада жылу қуатының тапшылығы 251 Гкал/сағ-қа жеткен, бұл әсіресе қыс мезгілінде күрделі мәселелер туындатып отыр. Жоба Қазақстан мен Ресей арасындағы ынтымақтастық негізінде жүзеге асырылуда. Негізгі серіктестер ретінде «Самұрық-Энерго» АҚ мен Ресейдің «Интер РАО-Экспорт» компаниясы тартылған, деп хабарлайды Altainews.kz  тілшісі. 

ЖЭО құрылысы 2029 жылға дейін аяқталады деп жоспарланған. Жаңа станцияның жобалық қуаты қала мен оның маңындағы аудандардың энергия қажеттіліктерін толық қанағаттандыруға жеткілікті болады. Негізгі отын ретінде Екібастұз көмірі пайдаланылады, бұл Қазақстанның ішкі ресурстарын тиімді қолдануға мүмкіндік береді. 

Бастапқы кезеңде станция көмірмен жұмыс істесе де, экологиялық жағдайды жақсарту мақсатында оны болашақта газ отынына ауыстыру көзделуде. Бұл атмосфераға зиянды заттардың шығарылуын, соның ішінде көмірқышқыл газын, күлді және басқа да қалдықтарды айтарлықтай азайтуға мүмкіндік береді. 

Қазіргі таңда Өскемен қаласында бірнеше ескірген қазандықтар жұмыс істеп тұр. ЖЭО іске қосылғаннан кейін олардың бесеуі толықтай жабылады. Бұл шара экологиялық жүктемені азайтып, ауа сапасының жақсаруына ықпал етеді. Сонымен қатар, жаңа инфрақұрылым жылу беру тиімділігін арттырып, шығындарды азайтуға мүмкіндік береді. 

Экологияны жақсарту үшін тағы бір маңызды қадам – күл қалдықтарын жинау және қайта өңдеу жүйелерін енгізу. Бұл шаралар қаланың экологиялық тұрақтылығын қамтамасыз етуде маңызды рөл атқарады. 

Бұл жоба Қазақстан мен Ресей арасындағы энергетикалық және экономикалық ынтымақтастықты тереңдетуге бағытталған. ЖЭО құрылысы тек Өскеменнің ғана емес, бүкіл Шығыс Қазақстан өңірінің энергетикалық инфрақұрылымын жаңартуға және дамытуға ықпал етеді. 

Аймақтық даму тұрғысынан алғанда, жаңа станция жұмыс орындарын ашып, жергілікті халықтың әлеуметтік жағдайын жақсартуға мүмкіндік береді. Сонымен қатар, ЖЭО өңірдің энергетикалық тәуелсіздігін арттырып, Қазақстанның энергетика саласындағы орнықты дамуына үлес қосады. 

ЖЭО құрылысы – Шығыс Қазақстан өңірі үшін стратегиялық маңызы бар жоба. Ол қала тұрғындарының өмір сапасын жақсартып қана қоймай, өңірдің экологиялық тұрақтылығын қамтамасыз етеді. Алдағы жылдары осы жобаның сәтті іске асуы елдің энергетикалық және экологиялық дамуына зор ықпал етеді деп күтілуде.