Бүгін Өскемен қаласында жұмысшы мамандықтар жылының іс-шаралар жоспарын іске асыру аясында «Болашақ мамандар» облыстық форсайт-семинары өтті, деп хабарлайды Altainews.kz тілшісі.

«WorldSkills Shygys-2025» және «AgroSkills Shygys-2025» аймақтық жұмысшы мамандықтар чемпионаттарын өткізуге дайындыққа бағытталған бұл шара Өскемен көпсалалы технология колледжінде ұйымдастырылды.

ШҚО кәсіптік білім беру орталығы директорының орынбасары Ләзат Кездікбаеваның айтуынша, семинарға «WorldSkills Kazakhstan-2024» республикалық чемпионатының сарапшылары, аймақ колледждерінің өндірістік оқыту шеберлері және арнайы пәндердің оқытушылары қатысты.

Шара барысында сарапшылар республикалық және халықаралық жарыстарда қатысушылардың бәсекеге қабілеттілігін арттыруға бағытталған оқытуда заманауи технологияларды пайдалана отырып, студенттерді даярлау тәжірибесімен бөлісті.

Айта кетейік, білім басқармасы облыстың кәсіпорындарымен бірлесе отырып, биылғы жылдың 12-16 мамыр аралығында Өскемен қаласының Құзыреттілік орталықтары мен жетекші колледждерінің базасында 34 құзыреттілік бойынша, 140-тан астам 21 жасқа дейінгі студенттердің, колледж түлектерінің және жұмыс істейтін жастардың қатысуымен «WorldSkills Shygys» және «AgroSkills Shygys» аймақтық кәсіби шеберлік чемпионаттарын өткізуді жоспарлап отыр. 

Аймақтық чемпионаттың жеңімпаздары ағымдағы жылдың қараша айында Астана қаласында өтетін «WorldSkills Kazakhstan 2025» республикалық чемпионатына жолдама алады.

Айжанат Бақытқызы

Фото/видео: Даниил Суворов