Биыл елімізде «Жұмысшы мамандықтары жылы» деп жарияланды. Қазақстандағы өндіріс пен металлургияның маңызды орталықтарының бірі – Риддер қаласында осы жылдың салтанатты ашылу рәсімі өтті.

Жұмысшы мамандықтарының қоғамдағы рөлін арттыру және өндіріс саласында еңбек етіп жүрген азаматтарға құрмет көрсету мақсатында ұйымдастырылған бұл шара қала тұрғындары үшін ерекше маңызға ие болды. Риддер қаласы әкімінің орынбасары Қаныбек Төлеуханов жұмысшы мамандықтарының ел экономикасындағы маңызын атап өтті.

Салтанатты жиында түрлі сала мамандары марапатталды. Металлургия, орман шаруашылығы, жылу энергетикасы және басқа да өндіріс орындарында еңбек етіп жүрген азаматтарға арнайы алғыс хаттар табысталды.

Марапатқа ие болғандар:

• Сейітқали Алмас Советқалиұлы – Риддер қаласы Төтенше жағдайлар басқармасының №1 мамандандырылған өрт сөндіру бөлімінің жүргізушісі.
• Устинович Елизавета – «Водоканал» ШЖҚ-ғы КМК ағынды суларды тазарту құрылыстарының операторы.
• Задонцев Виктор – «Эталон» ЖШС жүргізушісі.
• Манвайлер Галина – «Казцинк» ЖШС Шығыс Қазақстан тау-кен байыту кешенінің Риддер-Сокольный кенішінің жобалау-конструкторлық қызметінің бастығы.
• Валуйских Игорь – «Л-ТВК» ЖШС электр және газбен дәнекерлеушісі.
• Ногосбаев Фарид – ШҚО Табиғи ресурстар және табиғат пайдалануды реттеу басқармасының Риддер қаласындағы Журавлиха орманшылығының басшысы.
• Акстютич Борис – «Риддер қаласының Шығыс жылу» ЖШС турбиналық цехының ауысым бастығы.
• Жуков Сергей – Табиғи ресурстар және табиғатты пайдалануды реттеу басқармасының Пихтовский орман шаруашылығы Бутаковский орманшылығының орманшысы.

Салтанатты рәсімде Алмас Сейітқали сөз сөйлеп, бұл бастаманың жастарға үлгі болатынын атап өтті.

Шара барысында Риддер қаласының өнерпаздары өз өнерлерін ортаға салды. Шығыс Қазақстан облысының «Туған жер – алтын бесігім – 2024» жобасының жеңімпазы атанған жергілікті өнер ұжымдары көрермендерге рухани кеш сыйлады. Олардың орындауындағы патриоттық әндер шараның мәні мен маңызын арттыра түсті.

Қала әкімдігі алдағы уақытта жұмысшы мамандықтарын дәріптейтін түрлі іс-шаралар ұйымдастырып, жастарды техникалық және кәсіптік білім алуға ынталандыруға басымдық беретінін мәлімдеді. Риддер қаласында өткен бұл шара жұмысшы мамандықтарының мәртебесін көтеріп қана қоймай, жас буынға болашақ кәсібін таңдауға ой салған игі бастама болды.

Қуаныш Рахметоллаұлы
Фото/видео: Данияр Сағидолдин