Жол бойында 14 сервистік нысан пайда болады – ШҚО
Шығыс Қазақстан облысының аумағындағы негізгі автомобиль трассаларының бойында санитарлық-гигиеналық торабы бар 14 сервистік нысан пайда болады.
Облыстық кәсіпкерлік және индустриялық-инновациялық даму басқармасы басшысының орынбасары Марат Қабақовтың айтуынша, өңірде туризм саласын дамыту мақсатында бірқатар ауқымды жоба қолға алынуда. Солардың бірі – облыстың туристік аймақтарына апаратын жолдардың бойында санитарлық-гигиеналық тораптар салу жобасы, деп хабарлайды Altainews.kz тілшісі.
– Облыстың негізгі жолдарында санитарлық-гигиеналық тораптары бар сервис нысандарын орналастыру үшін 14 орын белгіленді. Олар жалпы ұзындығы 800 шақырымнан асатын жолдардың бойында орналасып, арлы-берлі өткен жолаушыларға қызмет көрсететін болады. Сонымен қатар туристер үшін логистиканы жақсарту мақсатында инвесторды тарта отырып Катонқарағай ауданындағы әуежайды қайта құру мәселесі пысықталуда. Өзара түсіністік туралы меморандум келісу сатысында тұр. Ауданмен әуе қатынасы туристердің жолға кететін уақытын барынша қысқартуға мүмкіндік береді, – деген М.Қабақов ұшақпен ұшатын демалушылар уақытты сегіз сағатқа дейін үнемдейтінін жеткізді.
Басқарма басшысының сөзіне қарағанда, биыл өңірге турист тарту мақсатында «Қызылтас тауына шығу» (сәуір), «Bukhtarmafest» (қыркүйек), бүркітшілер фестивалі (қараша) және басқа хайкинг іс-шаралар ұйымдастыру жоспарланып отыр екен.
Оқи отырыңыз
