Самар ауданына қарасты Новостройка ауылында әскери-патриоттық лагерь өз жұмысын бастады.
Ақыл-ойды ұштап, төзімділікке баулитын он күндік лагерьге облыс аумағынан 45 бала қатысуда, деп хабарлайды Altainews.kz тілшісі.
Бұқтырма су қоймасының жағасындағы «Балауса-2» балалар лагерінің базасындағы демалысқа 7-8 сынып оқушылары шақырылған.
– Бірінші маусымнан бастап балаларға арналған демалыс маусымы басталған болатын. Оқушылардың жазғы демалысын қызыққа толтыру мақсатында әртүрлі жобалар әзірленген. Соның бірі осы әскери-патриоттық лагерь. Мұнда облыс бойынша 45 бала жасақталды. Негізгі мақсат – балаларға ұмытылмас демалыс ұйымдастыра отырып, патриоттық тәрбие беру және төзімділіктерін шыңдап, әскери өмірдің қыр-сырымен таныстыру, – деді облыстық білім басқармасының басшысы Иннеса Чернышева.
Он күндік демалыста оқушыларды әскери дайындық бойынша танымдық сабақтар, дене шынықтыру жаттығулары мен ойындар, сондай-ақ, туристік жорықтар күтіп тұр.
– Балалардың демалысын қызықты әрі пайдалы өткізу үшін жоспар жасадық. Әскери орыннан арнайы үш офицер де он күн бойы оқушылармен болып, оларды қару-жарақты қолдану, жорыққа шығу және салауатты өмір салтын ұстану дағдыларына баулитын болады. Сондай-ақ, біздің өңірден шыққан Ұлы Отан соғысының ардагерлеріне арналған мұражайларға саяхат жасау жоспарланған, – деді «Балауса-2» спорттық сауықтыру лагерінің директоры Дәурен Талғатұлы.
Жазғы уақытты қызықты әрі пайдалы өткізуге келген оқушылар демалысты сапқа тұрып, салтанатты ант қабылдаудан бастады.
– Лагерге Риддер қаласынан келдім. Алғашқы күннен бастап барлығы ұнап жатыр. Бүгін ант қабылдадық. Өзімді сарбаз ретінде сезініп, бойымды ерекше сезім кернеп тұр, – деді оқушы Қайыржан Дарханұлы.
