Студенттер әскери далалық жиынға қатысуда
С. Аманжолов атындағы Шығыс Қазақстан Университетінің Қабанбай батыр атындағы әскери кафедрасының студенттері Өскемен гарнизонының 27943 әскери бөлімінің полигонында әскери далалық жиынын өтуде, деп хабарлайды Altainews.kz тілшісі.
Әскери далалық жиындардың мақсаты — студенттердің алғашқы әскери даярлық бағдарламасын іс жүзінде қолдануға үйрету. Студенттер үшін мұндай далалық жиын тек әскери дағдыларын жетілдіруге ғана емес, сонымен қатар төтенше жағдайларда өздерінің жеке және командалық қасиеттерін тексеруге мүмкіндік береді. Бұл тәжірибе көбінесе тәртіпті, жауапкершілікті және командада жұмыс істеу қабілетін нығайта отырып, олардың өмірлік және кәсіби жолын қалыптастырудың кілті болып табылады.
Бұл жиын кафедра студенттеріне далалық әскери сарбаздың өмірін толықтай сезінуге мүмкіндік береді. Себебі олардың күндері физикалық және саптық дайындықпен басталып, тактикалық жаттығулармен, жауынгерлік атыс және әскери көліктерді жүргізу сынды тапсырмаларды орындаудан тұрады.
Әскери далалық жиынға қатысу кез келген сарбаз үшін нағыз сынақ және жеке, кәсіби дамудың маңызды кезеңі саналады. Бұл студенттер үшін тәжірибе мен жаңа дағдыларды игерудің тамаша тәсілі.