Өскемендегі 800-ден астам тұрғыны бар «Ярославец» пен «Рауан-Восход» бау-бақша серіктестіктерінде екі күннің бірінде жарық сөнеді. Бір қызығы, жергілікті тұрғындардың айтуынша, халықтың «Шығысэнерготрейд» ЖШС алдында анау айтқандай қарызы да жоқ екен, «электр энергиясы үшін төлемді ай сайын кешіктірмей жасап отырамыз» дейді олар.

Соған қарамастан, 300-ден астам үйі бар іргелес жатқан екі бау-бақша серіктестігінің тұрғындары жарықтың игілігін жөнді көре алмай отыр, деп хабарлайды Altainews.kz тілшісі.

Белгілі болғандай, бір іргелі ауылға пара-пар халқы бар елді мекендердегі проблема осыдан бірнеше ай бұрын басталған-ды. Негізі, бұл мәселе бұрыннан бар болатын, алайда соңғы бірнеше айда жағдай тіптен ушығып кетті, дейді тұрғындар. Әсіресе, кішкентай балалар мен науқас жандарға оңай болмай тұрған көрінеді.

Сондай жандардың бірі – Күлзада Нұрахметова. Өкпені жасанды желдету аппаратына қосылған 66 жастағы Күлзада апай түйіні тарқамай тұрған жарық мәселесі тезірек шешілсе екен деп тілеп, жоғары жақтағылардан көмек сұрап отыр.

Жалпы, қазіргі уақытта облыс орталығының әр шетінде орналасқан саяжайлар мыңдаған тұрғынның тұрақты мекенжайына айналған. Бау-бақша серіктестіктерінің тұрғындарына қалалық ретінде тіркелуге де рұқсат берілген. Алайда, мәселенің екінші жағы да бар. Негізі, әу баста саяжай үйлері жыл бойы тұруға арналып салынбаған еді. Демек, кооперативтердегі электр желілері қазіргі кездегі жүктемелерге есептелмеген. Жарықтың жиі сөнуі де содан, дейді мамандар.

Тұрғындар қала әкімдігінің бұл уәжімен де келісіп отыр. «Өзіміздегі электр желілері мен трансформаторды жөндеуге қарсы емеспіз. Сондай-ақ қоқыс шығару және үйлерге су тарту мәселелерін де өз бетімізше шешуге әзірміз. Тек осы жарық мәселесін бір жақты етсе, деген тілегіміз бар» дейді жергілікті тұрғындар.

Қалалық әкімдікке хабарласқанымызда, ондағылар бау-бақша серіктестігінің ішіндегі электр желілері әбден тозғанын айтып, оларды күтіп ұстау жұмыстары да ойдағыдай жүргізілмей келе жатқанын жеткізді. Ал мұның бәрі – жарықтың жиі сөнуіне бірден-бір себеп.