Жексенбіде Қазақстанның көлік саласының қызметкерлері кәсіби мерекесін атап өтті. Жүргізуші, диспетчер, кондуктор, машинист, жолсерік, ұшқыш, стюардесса, техникалық қызметкерлер, яғни автомобиль, теміржол, су және әуе көлігінің 650 мыңнан астам өкілі күн сайын халықтың жайлы әрі қауіпсіз қозғалысын қамтамасыз етеді. Осы орайда Altainews.kz тілшісі кәсіп өкілдерінің бірін әңгімеге тартқан еді.

Ерболат Шәкенов 36 жыл бойы көлік жүргізіп, оның 30 жылында автобус жүргізушісі болған. Ол бала кезінен автобус жүргізуді армандағанын айтады. Еңбек жолын Алматы мен Үшаралға қатынайтын қалааралық маршруттардан бастап, Новосібір мен Қарағандыда болды. Ал 90-жылдардың аяғында Астана елорда болған кезде жерлестерін Қазақстанның бас қаласына тасымалдайтын болған.

Бүгінде Ерболат аға «Vostok Bus» ЖШС-нің аға жүргізушісі. Оның бағыттары – Өскемен – Зайсан, Өскемен – Ақжар, Өскемен – Алматы, Өскемен – Павлодар.

Бүгінде Шәкеновтер отбасының балалары есейген, үлкен қызынан немерелер сүйіп отыр, ал кенжесі медициналық университетте оқуын аяқтауда. Ал жұбайы оның жұмыс кестесіне үйреніп қалған. «30 жылдан кейін қайда барсын» деп әзілдейді Ерболат аға.