Осыдан екі жыл бұрын Өскемен қаласында пайдалануға берілген теннис орталығына бүгінде келушілер көп. Спорттық нысанның игілігін өскемендіктермен қатар, қала қонақтары да көруде.

Мұнда келушілердің белсенді демалысы үшін барлық жағдай жасалған. Орталықта үстел теннисі мен тренажер залдары жұмыс істеп тұр. Ал жақында бұл жерде бадминтон корты да ашылды. Сонымен қатар, аэрохоккейдің принципіне ұқсайтын зағип жандарға арналған үстел теннисін ерекше атап өткен жөн. Байқағанымыз, кешенге келушілердің арасында Өскемен қаласының спорт ардагерлері көп, деп хабарлайды Altainews.kz тілшісі.

Жүздеген саңлақты тәрбиелеген осындай спорт ардагерінің бірі – Владимир Ситников. Ол бұған дейін үстел теннисінен облыстың аға жаттықтырушысы қызметін атқарған.

Зейнеткерлікке әлдеқашан шығып кеткеніне қарамастан, ол үлкен спорттан қол үзбеген, өзі де жаттығу жасап, салауатты өмір салтын ұстанады. Сонымен бірге ардагер спортшы түрлі жарыстарда төреші болып, жас спортшыларға тәлім-тәрбие беруді де ұмытпайды.

Осы ретте Шығыс Қазақстанда қарт адамдарды қолдау мақсатында облыстық денешынықтыру және спорт басқармасымен көптеген іс-шаралар қолға алынғанын айту керек. Өңірдегі спорт нысандарында зейнеткерлерге қажетті барлық жағдай жасалған.

Дене шынықтыру және спорт басқармасы басшысының орынбасары Серік Құсымбаевтың айтуынша, қазіргі уақытта облыста 1 687 спорт нысаны жұмыс істесе, оның 1 166-сы ауылдық жерлерде орналасқан екен. Бұл нысандарда зейнеткерлер мен мүмкіндігі шектеулі жандарға арналған тегін сабақтар өткізіледі.

Қазіргі уақытта Шығыс Қазақстанда аға буын үшін қолжетімді болатын тағы алты дене шынықтыру-сауықтыру кешенінің құрылысы жүріп жатыр.