Волейболдан Ұлттық лига командалары арасындағы тұрақты ел чемпионаты «Алтай» аруларының жеңісімен аяқталды. Осылайша, өскемендік команда плей-офф кезеңіне бірінші орынмен шықты.

Жарыстың жартылай финалында біздің қыздар «Алматы» волейболшыларымен шеберлік байқасатын болады.

Еске салайық, тұрақты чемпионаттың соңғы тур ойындары Петропавл қаласында өткен-ді. Бұл турда жерлестіріміз барлығы жеті кездесу өткізіп, оның жетеуінде де жеңіске жетті. Сол ойындардың бірінде біздің команда былтырғы ел чемпионы «Жетісуды» тізе бүктіріп, көш басына көтерілді. Бітіспес қарсыластар арасындағы бұл матч 3:2 (партиялардағы нәтиже 26:28, 16:25, 25:22, 25:21, 15:11) есебімен аяқталды.

Осы ретте, Петропавлдағы ойындар барысында «алтайлықтар» екі-ақ партияда (екеуі де «Жетісумен» кездесуде) жеңіліс тапқанын айтқан жөн. Қалған қарсыластарына қыздарымыз бірде-бір партияны ұстатқан жоқ. Елордалық «Ару Астана», петропавлдық «Қуаныш», павлодарлық «Ертіс», өскемендік «Алтай-2», сондай-ақ, «Алматы» және «Қарағанды» командаларымен өткен кездесулер 3:0 есебімен Сана Анарқұлова бастаған ұжымның пайдасына аяқталды.

Статистикаға көз жүгіртсек, тұрақты чемпионат аясында барлығы 28 ойын өткізген жерлестеріміз оның 26-да жеңіске жетіп, екеуінде қарсыластарына жол берген. Жарыс қорытындысы бойынша «Алтай» мен «Жетісу» бірдей ұпай (екеуінде де 78) жинағанын айту керек. Алайда, талдықорғандық волейболшылар «алтайлықтарға» қарағанда партияларда жиірек сүрінген екен. Сол себепті, бірінші орын өскемендік командаға бұйырыпты.

Жоғарыда айтқандай, плей-офф кезеңінде «Алтай» «Алматымен» кездесетін болады. Ал екінші жартылай финалда «Жетісу» мен «Қуаныш» өзара кім мықтыны анықтамақ. Бұл екі ойынның жеңімпазы ел біріншілігінің финалына жолдама алады.