Тұғылда спорт кешені салынады
Ашық дереккөздерден алынған сурет
Тарбағатай ауданына қарасты Тұғыл ауылында денешынықтыру және спорт кешенін салу жоспарланып отыр.
Бұл туралы Өңірлік коммуникациялар қызметі алаңында өткен баспасөз брифингінде Тарбағатай ауданының әкімі Дархан Жөргекбаев мәлімдеді, деп хабарлайды Altaynews тілшісі.
Айта кету керек, Қасым-Жомарт Тоқаев VIII сайланған Парламенттің бірінші сессиясының ашылуында сөйлеген сөзінде бұқаралық спортты дамытуға да баса назар аударған болатын.
– Қазір саламатты өмір салтын насихаттап, бұқаралық спортты дамыту айрықша маңызды. Әсіресе балалардың спортпен айналысуына жағдай жасау қажет. Мұның бәрі халықтың денсаулығын жақсартуға мүмкіндік береді. Мен бұл мәселе жөнінде Жолдауымда айттым. Мемлекет спорт инфрақұрылымын жетілдіруге көп көңіл бөледі. Елімізде 43 мыңнан астам спорт ғимараты бар. Олардың жартысынан көбі ауылдық жерде орналасқан. Бірақ қарапайым және қолжетімді нысандар әлі де аз, – деді Президент.
Осы орайда, спорт саласын дамыту мақсатында биыл Тұғыл ауылында денешынықтыру және спорт кешенін салып, әлемдік және халықаралық жарыстарды өткізуге мүмкіндіктер пайда болмақ.
– Жоба құны 922,0 млн теңгені құрайды. 2023 жылы 450,0 млн теңге бөлінді. Аталмыш жоба Республикалық «Ауыл – ел бесігі» бағдарламасы аясында 2023-2024 жылдары іске асырылмақ, – деп атап өтті аудан әкімі.
Оқи отырыңыз
