Төтенше жағдайлар министрі Шыңғыс Әрінов Усть-Таловка ауылына келіп, жергілікті ерікті өрт сөндіру жасағына жаңа техника тапсырды. Өрт сөндірушілерге көліктің кілтімен қатар жауынгерлік киім-кешек, арнайы құралдар және компьютер берілді, деп хабарлайды Altainews.kz тілшісі.

Министрдің айтуынша, ерікті өрт сөндірушілерді қолдау Үкімет назарындағы маңызды бағыттың бірі. Бұл жұмыс алдағы уақытта да жалғаса береді.

ШҚО әкімі Нұрымбет Сақтағанов та өрт сөндіру бекеттерін қажетті техникамен жабдықтау үшін жыл сайын жергілікті бюджеттен қаражат бөлінетінін айтты.

Жаңа техниканың келуімен Усть-Таловкадағы өрт сөндіру тобының жұмысын кеңейту мүмкіндігі пайда болды. Қазір мұнда төрт адам еңбек етеді. Олар тек ауыл ішінде ғана емес, қажет болса, жақын маңдағы елді мекендерге де көмекке барады.