2017 жылы донор кезегін күткен 91 адам қайтыс болса, 2018 жылы 121 адам өмірден өткен, деп хабарлайды Алтайньюс тілшісі.

Медицина мамандарының айтуынша, Қазақстанда ағза доноры өте тапшы.

– Қазіргі уақытта кезекте 3 128 адам тұр. Жыл сайын жүз шақты адам ота кезегіне жете алмай қайтыс болады, – дейді дәрігерлер.  

Ресми деректерге сүйенсек, елімізде бүйрек ауыстыруға 2 706 азамат өтініш білдірген және оның 69-ы балалар. Бауырдың трансплантациясына кезекке тұрған 295 адамның ішінде 6 бала бар. Өкпесін ауыстыру үшін жеті адам кезекке тұрған. Сондай-ақ жүрек трансплантациясына кезекке тұрғандар саны 120-ға жетіп жығылады. Оның ішінде 13 бала бар.

Трансплантация және жоғары технологиялық медициналық қызметтерді үйлестіру республикалық орталығының ақпаратына сәйкес, бүйректі алмастыру шамамен 3 миллион 200 мың теңге . Бауырды алмастыру құны 5 миллион 800 мың болса, жүректі алмастыру отасына 25 миллион қаражат қажет. Бірақ бұл оталар тегін медициналық көмектің кепілдендірілген көлеміне кіреді. Сол себепті ота шығынын мемлекет төлейді.