Облыстың еңбек ұжымдары Жаңа жылды жаңа дәстүрмен қарсы алды. Биыл Шығыстағы еңбек ұжымдары елімізге төрлеткелі отырған жаңа жылды әдеттегідей мейрамхана, дәмханалардағы корпоративтік отырыстармен емес,  ұжымдық спорттық сайыспен, отбасылық өзара спорттық жарыспен өзгеше етіп қарсы алуды ұйғарды. Жыл соңында Өскеменде ерекше етіп ұйымдастырылған  жаңажылдық «ALTAY SPORT FEST-2024» ойындарына аймақтың әр түкпірінен келген 40-тан астам команда құрамында  800 адам қатысты. Шарапатты, шаттықты шараға қатысқандардың көпшілігі - отбасылық командалар, деп хабарлайды Altainews kz.тілшісі.
Жаңа жыл қарсаңында  Өскемендегі О.Рыпакова атындағы жеңіл атлетика орталығында облыс кәсіпорындары мен ұйымдарының еңбек ұжымдары  арасында ауылдықтар мен қалалықтардың басын қосып, біріктірген, жігіттер мен қыздардың, бүкіл бір отбасы мүшелерінің ептіліктері мен шымырлықтары, шапшаңдықтары сынға түскен «ALTAY SPORT FEST-2024» ойындары өтті. Бұл әдемі додаға аудандар мен қалалардан келген 13 команда, облыстық басқармалардың 20 командасы, ШҚО прокуратурасы және Казцинк, «Ертіс» ӘКК» АҚ бастаған бірнеше еңбек ұжымдары қатысып, тартысты сайыста ешқайсы да өздерінің осал еместігін көрсетіп бақты.
“Футбол дартсы”, “кедергілер жолағы”, “айдаһарлар”, “қуып жет”, “мұнаралар”, “эстафеталар”, “командалық арқан тарту” тәрізді танымал бұқаралық спорт түрлері  ұйымдастырылған алаңдарға ширыға шыққан барлық топтың мүшелері спортқа бейімділіктерімен, күштерімен, алғырлықтарымен де айрықша көзге түсіп, қошемет пен қолдауға ие болды.
«ALTAY SPORT FEST-2024» ойындары барысында асық ату, армрестлинг, үстел теннисі, гір көтеру, тоғызқұмалақ, дойбы, шахмат, бадминтон, масреслинг (таяқ тарту) сияқты спорт түрлерінен қосымша алаңдарда да қатысушылар мен жанкүйерлер өзара сайысып, қабілет-қарымдарын көрсетіп жатты.  

«ALTAY SPORT FEST-2024» облыстық спорттық ойындары өз мәресіне жетіп, салтанатты шарада жүйріктердің ішінен оза шапқан жеңімпаздар анықталып, қошемет, құрмет көрсетіліп, марапатталды. Өзгеше өткен ойынның қорытындысында : I-орынды Күршім ауданы, II-орынды облыстық прокуратура ұжымы, III-орынды Марқакөл ауданының командалары иеленді.

Жанаргүл Көкенайқызы

Фото: Аяужан Утеулинова