Сәрсен Аманжолов атындағы ШҚМУ-дың екінші курс студенті Серікбол Ермеков кикбоксингтен Ирландияда өткен Әлем чемпионатында топ жарды. Бұл жөнінде жоғары оқу орнының баспасөз қызметі хабарлайды.

Биылғы жаһандық додаға 25 елдің спортшылары қатысыпты.

Бұл – Серікбол Ермековтың бірінші ірі жеңісі емес. Ол бұған дейін жастар арасындағы ел чемпионатында жеңіске жеткен болатын. Сондай-ақ 2016 жылы Әлем кубогында екінші орын алған.

Серікбол – Катонқарағай ауданының тумасы, кикбоксингпен 12 жасынан айналысады. Оның оқу үлгерімі де жақсы, дейді оқытушылары.

Осы орайда, чемпионның бапкерлері Ержан Шегенов пен Ермек Мүкенов екенін айта кеткен орынды.