Өрт сөндіруші Асылан Бекенов: «Абыройлы мамандық таңдағанымды түсіндім»
Фото: ШҚО ТЖД
Өскемен қаласындағы №7 өрт сөндіру бөлімінің аға өрт сөндірушісі Асылан Бекенов төтенше жағдайлар қызметінде 2016 жылдан бері жұмыс істеп келеді. Ол өз мамандығын жақсы көреді және оны ең абыройлы жұмыстардың бірі деп санайды, деп хабарлайды Altainews.kz тілшісі.
Асылан Бекенов Марқакөл ауданындағы табиғи өрттерді сөндіруге қатысқан, ол әріптестерімен бірге бірнеше күн бойы орманды аймақты оттан қорғады.
«Менің қарауылым – менің екінші отбасым. Өйткені, әрбір өртке бірге барған кезде сен оларға өз өміріңді сеніп тапсырғаныңды түсінесің. Қорқынышты кездер болады, бірақ осы мамандықты азаматтардың қауіпсіздігі үшін таңдағаныңды түсінесің», - дейді азаматтық қорғаныс сержанты Бекенов.
Өрт сөндіруші есінде қалған орман өрттері туралы айтты.
«Әсіресе, ағаштардың ұшар басына дейін жетіп, санаулы минуттарда таралатын өрттер есімде. Орман жиі-жиі қолжетімсіз жерлерде өртенеді. Ыстық ауа райы, жел бағытының жиі өзгеруі оттың тез таралуына септеседі», - дейді ол.
Асылан бірнеше рет адамдарды құтқарған.
«Михаэлис көшесінде болған өрт есімде. Түтін толған пәтерден ер адамды тауып, оны көтеріп шығардым. Мен лайықты мамандық таңдағанымды түсінемін. Отбасымда мен бірінші өрт сөндірушімін, туыстарым мені мақтан тұтады», - дейді ол.
Қызметінен бос уақытында Асылан отбасына, әсіресе кішкентай ұлына және спортқа көңіл бөледі.
Әріптестері Асыланды батылдығы мен адалдығы үшін құрметтейді. Ол әріптестеріне көмек көрсетуге әрқашан дайын.
Оқи отырыңыз
