Төтенше жағдайлар кезінде қауіпсіздік ережелерін дұрыс сақтауды кішкентай көрермендерге түсіндіру мақсатында мультфильмдер шығаруды Шығыс Қазақстан облысының Төтенше жағдайлар департаменті осыдан үш жыл бұрын бастаған еді. Міне, жуықта сол бастаманың кезекті жемісі – «Тентек пен Айя» атты анимациялық мультфильмнің жаңа бөлімі өз көрермендеріне жол тартты, деп хабарлайды Altainews.kz  тілшісі.

Тентек пен Айя – ШҚО ТЖД және «Казцинк» ЖШС бірлесіп шығарған мультфильм кейіпкерлері. Мультфильмнің бірінші сериясы су айдындарындағы қауіпсіздікке арналса, екіншісі – жер сілкінісі кезінде қалай әрекет ету керектігін түсіндірді. Жуырда мультфильмнің өрт қауіпсіздігіне арналған үшінші бөлімінің таныстырылымы өтті.

Мультфильмдер ШҚО ТЖД мен «Казцинк» ЖШС бірлесіп жүзеге асырған әлеуметтік маңызы бар алғашқы жоба емес. Осыған дейін төрт жылдық ынтымақтастық аясында облыстағы көпбалалы және әлеуметтік осал отбасылардың үйлеріне 10 мыңнан астам көк түтінді анықтайтын датчиктер орнатылды. Соның арқасында, ондаған адамның өмірін ықтимал өрттен сақтап қалу мүмкіндігі туды.

Мультфильмнің алғашқы көрермендері «Үміт» балалар үйінің тәрбиеленушілері болды. Оларға тұсаукесері болған жаңа серия облыс орталығындағы кинотеатрлардың бірінде көрсетілді.

Алдағы уақыттарда «Тентек пен Айяның» жаңа оқиғалары облыс пен еліміздің барлық білім беру мекемелерінде көрсетілмек.

Бұл жоба балалардың бойында жастайынан қауіпсіздік мәдениетін қалыптастыруға бағытталған бизнестің мемлекеттік құрылымдарымен тиімді әріптестігінің үлгісі екені сөзсіз.