Шығысқазақстандық балуан халықаралық доданың жүлдегері атанды, деп хабарлайды Алтайньюс тілшісі.

Ресейдің Хасавюрт қаласында еркін күрестен өтіп жатқан Құрлықаралық кубок үшін жарыста семейлік Азамат Дәулетбековтің қанжығасы майланды.Осымен 11-ші рет жалауын желбіреткен байрақты бәсекеде 10 мемлекеттің атынан 200-ден астам саңлақ қатысуда. Олардың арасында Олимпиада ойындары мен жаһандық біріншіліктерде сан мәрте бақ сынаған балуандар да бар.86 келіге дейінгі салмақта өнер көрсеткен жерлесіміз жарыс аясында барлығы төрт белдесуге қатысып, оның түгелін өз пайдасына аяқтады. Шешуші кездесуде доданың фавориті саналған ресейлік Арсенали Мусалалиевтен 8:5 есебімен басым түскен Азамат осылайша, Құрлықаралық кубок үшін бәсекенің жеңімпазы атанды. Осы ретте жерлесіміз ұйымдастырушылар атынан қомақты ақшалай сыйлыққа да ие болғанын айта кеткен абзал.