Шығыс Қазақстан облысында "Дропперлар деген кім? Неліктен бұл қауіпті?" тақырыбында жастарды алаяқтардан қорғауға бағытталған шара өтті. Іс-шараны ШҚО бойынша экономикалық тергеу департаменті, «AMANAT» партиясы жанындағы «Жастар рухы» жастар қанаты және «Қарызсыз қоғам» ұйымдарының өкілдері ұйымдастырды. Шара Спортта дарынды балаларға арналған ШҚО олимпиада резервінің мамандандырылған мектеп-интернат-колледжінде өтіп, оқушылардың қаржылық сауаттылығын арттыру мен алаяқтықтан сақтандыру мақсатында өткізілді, деп хабарлайды Altainews.kz тілшісі.

Соңғы уақытта ел жаңалықтарында полицияның дропперлерді ұстағаны туралы мәліметтер жиі кездесуде. Алаяқтардың басты нысанасы – жастар мен жасөспірімдер.
Дроппер (немесе drop) – алаяқтар қылмыстық жолмен алынған ақшаны қолма-қол ақшаға айналдыру үшін пайдаланатын адам. Олар көбінесе жастарды, ақшаға мұқтаж студенттер мен жасөспірімдерді "қара жұмысқа" тартады. Мұндай алаяқтар өз құрбандарын әлеуметтік желілер, мессенджерлер, электрондық пошта және жұмысқа шақыратын хабарландырулар арқылы табады.

Кездесу барысында ШҚО бойынша «Қарызсыз қоғам» жобасының тәлімгері Ермек Жұмағұлов жастарға алаяқтардың арбауына түспеудің жолдарын түсіндіріп, еңбекпен табыс табудың маңыздылығын айтып берді.

Айта кетейік, былтыр Алматы қаласында дропперлердің алаяқтарға көмектескені туралы оқиға тіркелген болатын. Екі жас дроппер өздерінің банктік карталары мен мобильді банкинг аккаунттарын алаяқтарға ұсынып, олар зардап шеккен әйелдің шоттарынан 20 миллион теңгені қолма-қол ақшаға айналдырған. Қылмыстық іс қозғалып, дропперлер қамауға алынды.

Жанаргүл Көкенайқызы

Фото/видео: Данияр Сагидолдин