Радиоэлектроника және байланыс әскери инженерлік институтының 1-курс курсанттары Исмаков Ислам мен Досжан Дулатұлы өздері түлеп ұшқан алтын ұя мектептеріне оралып, жас буынға өнеге көрсетті.

Исмаков Ислам – 47-мектептің, ал Досжан Дулатұлы 15-орта мектептің түлегі. Олар мектеп оқушыларымен кездесіп, әскери қызметтің маңыздылығы мен Отан алдындағы борышты адал орындаудың жауапкершілігі туралы түсіндірді. Ерлік сабақ барысында курсанттар қызығы мен қиындығы мол әскери өмірлері жайлы әңгімелеп, әскери инженер мамандығының қыр-сырын бөлісті. Бұл шара жастарды жігерлендіріп, әскери мамандықтың қадір-қасиетін ұғындыруға бағытталды.

Курсанттар, сондай-ақ Радиоэлектроника және байланыс әскери инженерлік институтының ерекшеліктерін таныстырып, болашақта осы жолды таңдауға қызығушылық танытқан жастарды қанаттандырды.

Айта кету керек, Досжан Дулатұлының әкесі Дулат Уанов – 20 жылдан астам уақыт бойы әскери қызметте еңбек етіп келе жатқан тәжірибелі маман. Қазіргі таңда ол 27943 әскери бөлімінде взвод командирі қызметін атқарады. Әкесінің жолын қуған Досжан әскери мамандықты таңдап, әке жолын абыроймен жалғастыруда.

Мектеп мұғалімдері мен оқушылары болашақ офицерлерге алғыс білдіріп, олардың білім мен тәртіпті қатар ұштастырып, үлкен жетістіктерге жетулеріне тілектестік білдірді.