Алтай қаласында «Жомарт жүрек» деп аталатын дәстүрлі меценаттар форумы өтті.

Өткен жылы ауданда қалталы азаматтардың қолдауымен 13 жоба жүзеге асырылған болатын. Ал ағымдағы жылы жергілікті кәсіпкерлер жалпы сомасы 30 миллион теңгеден асатын 17 жобаны қолға алды.

Олардың ішінде ірі әлеуметтік жобаларды жүзеге асырып, аз қамтылған және көпбалалы отбасыларға, жарылыстан зардап шеккен Арыс қаласының тұрғындарына көрсеткен тегін көмегі үшін «Жомарт жүрек» жүлдесінің «Жыл адамы» аталымына ие болған «Восток Агро-Холдинг» ЖШС бас директоры Ержан Нұрбаевтың орны бөлек. Сол сияқты Бұқтырманың жағалауын абаттандыру, құрылыс жұмыстарын жүргізу, көшелерді жарықтандыру бағыттарында тындырған ауқымды шаруалары үшін «Жылдың үздік ұйымы» атанған «Бұқтырма цемент компаниясының» да еңбегі ерен.

Сонымен қатар Жанатбек Бұғыбаев, Надежда Акулова Николай Пятков, Алексей Овчинников сынды жерлестерімізге белсенді азаматтық ұстанымы үшін Алтай ауданы әкімінің алғыс хаттары тапсырылды.