2020 жылдан бастап балаларға арналған барлық дәрі-дәрмек әлеуметтік медициналық сақтандыру есебінен тегін болады, деп хабарлайды Алтайньюс тілшісі.

Бұл туралы Денсаулық сақтау министрі Елжан Біртанов мәлімдеді.

– Келесі жылдың 1 қаңтарынан бастап біз медициналық сақтандыру есебінен балаларға рецепт арқылы берілетін барлық дәрі-дәрмектерді тегін беруді жоспарлап отырмыз. Бұдан әрі біз халықтың әлеуметтік осал топтары арасында тегін дәрі-дәрмек алушылардың спектрін кеңейтетін боламыз, – деді Е.Біртанов.

Оның айтуынша, бүгінгі таңда 300 миллиард теңгеге жуық рецептуралық дәрі-дәрмектің ортақ нарығы бар. Бұған дейін осының үштен бір бөлігі ғана мемлекет есебінен жабылған екен.

– Біз осыған жету үшін ұзақ уақыт еңбектендік. Жылдан жылға қаржыландыруды арттырдық. Енді міне, медициналық сақтандыру шарты бойынша бұл мәселені түпкілікті шеше алдық, – деп түйіндеді Министр.