Облыс әкімінің Арыс қаласының тұрғындарына көмек көрсету жөніндегі үндеуіне алғашқылардың бірі болып үн қосқан «БИПЭК АВТО – АЗИЯ АВТО» компаниялар тобы болды. «АЗИЯ АВТО» АҚ президенті Ерік Сағымбаевтың айтуынша, шығысқазақстандық алпауыт кәсіпорынның жұмысшылары зардап шеккендерге қолдан келген көмектің бәрін көрсетеді.

– Біздің компания облыс әкімінің бастамасын сөзсіз қолдайды. Бүгін қызметкерлерімізбен үлкен жиын өткізіп, апаттың зардабын тартқан арыстықтарға қандай көмек көрсететінімізді анықтайтын боламыз, – деді Е.Сағымбаев.

Кешелі бері облысымыздағы қайырымдылық акциясына «Нұр Отан» партиясының белсенділерінен құралған топ та атсалысуда. Олар тұрғындардан азық-түлік, киім-кешек, гигиеналық заттар сияқты басқа да гуманитарлық көмекті қабылдап, таяу күндері Түркістан облысына жөнелтпек.

Айта кетейік, бүгінде облыстағы аудан орталықтары мен қалаларда Арыс тұрғындарына гуманитарлық көмек көрсету мақсатында ашылған 20-ға жуық пункт жұмыс істеп тұр.