Қазақстанда көпірлер мен жол айрықтары енді дрондар арқылы зерттелетін болады.

Елімізде 3-5 жыл сайын диагоностика жасалуы тиіс 2 мыңнан астам көпір бар. Автомобиль көпірлері және жол өткелдерінің техникалық жай-күйі мен зақымдануын анықау үшін мамандар дербес тексеру жұмыстарын жүргізіп, фототүсірілім жасайды. Осы мақсатта олар өз өмірлерін қауіпке тігіп, автокрандар мен альпинистік құралдардың көмегіне жүгінуге мәжбүр. Сондықтан келесі жылдан бастап мамандар дрон құрылғыларын пайдалана бастайды, деп хабарлайды Altaynews.kz тілшісі.

ҚР ИИДМ баспасөз қызметінің мәліметінше, аталған екі әдіс те жұмысшылардың өміріне қауіп төндіріп, көлік жүргізушілеріне қолайсыздық тудырады. Ал дрондар нысандарды диагностикалауды қауіпсіз етіп қана қоймай, үрдісті жылдам, арзан және тиімді етеді. Сондай-ақ дрондар жол қозғалысына кедергі келтірмейді.

Дрон арқылы зерттеу жүргізудің тағы бір артықшылығы бар, ол –жасырын жерлерді тексеру. Кейін түсірілген бейнежазбаларды компьютерде егжей-тегжейлі талдауға, жіті тексеруге болады.

Айта кетсек, жаңа көпірлерді 5 жылда бір, ескілерін 3 жылда бір рет тексеру қажет. Жыл сайын «ҚазжолҒЗИ» АҚ кем дегенде 15 нысанды зерттейді. Жалпы 59 жылдың ішінде институт мыңнан астамына диагностика жасаған.