Шығыс Қазақстан облысының әкімдігінде 2024 жылға арналған жөндеу науқанының жоспары талқыланды, деп хабарлайды Altainews.kz тілшісі.

Еске салайық, ТКШ инфрақұрылымын жөндеу және жаңғырту мәселесі өңірлер үшін өте өзекті. Президент Қасым-Жомарт Тоқаев Ұлттық Құрылтайдың үшінші отырысында осыған тоқталып, 55 жылу көзін жөндеуді және кемінде 6,5 мың шақырым инженерлік желіні жаңғыртуды тапсырды.

Осы жұмыстардың нәтижесінде жылу желілерінің тозуы 5,1 пайызға төмендеп, 60,6 пайыз болды.

Бұл жоспар жүзеге асқан жағдайда желілердің тозуы тағы бес пайызға төмендеп, 55,6 пайыз болады.

Өңірдегі ірі жылу көздерін жөндеуге ерекше көңіл бөлінетінін айта кеткен жөн. Инвестициялық бағдарлама шеңберінде 4,1 млрд теңгеге, «Инвестицияға айырбастау тарифі» бағдарламасы шеңберінде 2,3 млрд теңгеге жөндеу жүргізу жоспарланған. Риддер ЖЭО-ны жаңғыртуға биыл 8,5 млрд теңге бөлінуге тиіс. Жалпы нәтижеде ірі жылу көздерінің тозуы 56,4 пайызға тең болады, яғни 6,3 пайызға төмендейді деген сөз.