Жаңа жыл қарсаңында, 31 желтоқсан күні Qazaqstan ұлттық арнасы «Жарнамасыз жаңа жыл» акциясын бастайды. Яғни, бір күн бойы ұлттық арна эфиріндегі бағдарламалар мүлдем жарнамасыз көрсетілетін болады, деп хабарлайды Алтайньюс тілшісі.

Мереке күндеріне орай, ұлттық арна өз көрермендеріне қызықты шоу-бағдарламалар мен арнайы жобалар дайындап отыр. Бұл туралы "Қазақпарат" мәлімдеді.

Айта кетсек, кішкентай көрермендер әйгілі «Walt Disney» кинокомпаниясының үздік анимациялық фильмдерін тамашалай алады. Сағат 11:15-те «Ханшайым мен Құрбақа» көрсетілсе, 1 қаңтарда 11:45-те «Пингвиндер биі», ал, 2 қаңтар күні 13:20-да «Жұлдызды төбет» және т.б анимациялық фильмдермен тамашалай алады. Арна мәліметінше, бұл анимациялық фильмдердің барлығы «Қазақстан» корпорациясының кинокөрсетілім және дубляж бөлімінде аударылып, дыбысталған.

Сонымен қатар, 31 желтоқсан күні 14:25-те «Алатауым - алтын ұям» атты республикалық ақындар айтысының 1 бөлімінің тұсаукесері болмақ. Ал, айтыстың жалғасын, 2 және 3 бөлімдерін 1 қаңтарда 15:35-те және 2 қаңтарда 14:40-та көруге болады.

Ұлттық арна әзілсүйер көрермендеріне арнап 18:10-да, «Қазақстан» корпорациясының «Алтын қорында» сақталған, кезінде кеңінен танымал болған «Тамаша» ойын-сауықтық бағдарламасын тарту етпек.

Одан бөлек, 19:45-те белгілі әншілер: Әлішер Кәрімов, Луина және «Формат» тобының қатысуымен «Әзіл әлемі» ток-шоуының жаңа жылдық шығарылымы көрерменге жол тартады.

Ұлттық арнаның көрермендеріне ұсынатын ең басты сыйы - «20.19 Басты арнадағы Жаңа жыл» атты музыкалық шоу-бағдарламасы эфирге 21:50-де және 00:00-де шығады. Мерекелік шоуда қазақ эстрадасының танымал әншілері: Мақпал Жүнісова, Бекболат Тілеухан, Жанар Доғалова, Ерке Есмахан, Қайрат Түнтеков, Зируза, Ринго тобы және т.б өз өнерлерін көрсетеді.

Ал, «20.19 Басты арнадағы Жаңа жыл» шоу-бағдарламасының бас қонағы әлемге танымал әнші Димаш Құдайберген болмақ.