«ОблШығысЖол» кәсіпорны облыстағы 3186 шақырым жолды күтіп-ұстауға міндетті. Биыл облыс қазынасынан жолдарды күтіп-ұстауға 2 миллиард 802 миллион теңге бөлінген. Алғашқы сегіз айдың ішінде оның 2 миллиард теңгеден астамы игерілді, деп хабарлайды Алтайньюс тілшісі.

– «ОблШығысЖол» коммуналдық мемлекеттік кәсіпорны жыл басынан қыркүйек айына дейін жоспар бойынша 352 шаршы метр жолға ағымдағы жөндеу жүргізген, – деп мәлімдейді кәсіпорын мамандары.

Семейдегі аспалы көпірдің жұмыстары да кәсіпорынға тиесілі. Биыл көпірге ағымдағы жөндеу жүргізіліп, беті құм мен топырақтан тазартылған.

Сондай-ақ, кәсіпорын «Эльхон» серіктестігімен бірге Өскемендегі Сәтпаев даңғылын салуға атсалысып жатыр. Осы жылы Семей – Қарауыл жолының 59-71 шақырымы, Дмитиревка – Бородулиха – Шемонаиха жолының 0-7 шақырымы, Көкпекті – Самар – Васильев өткелі жолының 10-30 шақырымы, Кеңгірбай би ауылына кіре беріс жолдың 0-3,3 шақырымы орташа жөнделді, қазір Жұлдыз ауылына кіреберіс жол жөнделуде. Сонымен бірге, Алтайка – Чапаев жолындағы Крестовка өзенінен өтетін көпір күрделі жөнделіп жатыр.