Күршімдегі құлағалы тұрған электр бағанына кім жауапты?
Күршім ауданы орталығы іргесіндегі Мульковое ауылының тұрғыны Жадыра Үркімбаева редакциямызға хабарласып, үйінің іргесінде жоғары вольтты электр желісі бағанының қисайып, құлаудың аз-ақ алдында тұрғандығын айтты. Жауын жауып, қатты жел соққан сайын қисайып, жерге қарай жақындаған баған Новая көшесі тұрғындарының зәресін былтырдан алуда, деп хабарлайды Алтайньюс тілшісі.
Күн райы бұзылып, жауын-шашын, қара дауыл жиілейтін қазанайы да келіп қалды. Жылдан астам уақыт құзырлы органдар, атап айтқанда, «Шығысэнерготрейд» аудандық электр желілері торабы мекемесіне, аудандық сәулет, құрылыс, тұрғын үй- коммуналдық шаруашылығы, жолаушы көлігі және автомобиль жолдары бөлімі, ауылдық округ әкімдігінің есігін қағып, бірнеше мәрте шағымданып, электр бағанын қалыпты жағдайға келтіруді сұраған тұрғындардың тілегі ескерусіз қалуда. Ал , құлағалы тұрған бағанның сымдары қоршауларға таяп қалған.
«Қайғылы жағдай болмай тұрып, баған түзелсе» деген Мульковое ауылының тұрғындары, «кешқұрым көше шамдары толық жанса, ескі асфальт қалдығынан ойдым-ойдым болған жолдар жөнделсе» деген тілектерін қоса айтты. Ауыл ішінде жол бойында жылдамдықты шектеу сияқты бірде-бір белгінің болмауы да жұртшылық алаңдауына негіз. Сондай-ақ, шабақ өсірумен атағы ауданнан шалғайға шыққан елді мекен тұрғындарының ауыл көркін кетіріп тұрған иесіз үйлердің есептен шығарылып, сүрілуін жергілікті билік назарына алса деген базынасы тағы бар екен.