С. Аманжолов атындағы ШҚМУ-да алдағы уақытта бірқатар жаңа мамандықтар ашылуы мүмкін, деп хабарлайды Алтайньюс тілшісі.

– Ректораттың кезекті отырысында еліміз үшін аса қажет саналатын «Мұнай-газ ісі», «Органикалық заттардың химиялық технологиясы», «Мұражай ісі және ескерткіштерді сақтау», «Археология және этнология» мамандықтарын ашу бойынша мәселе қаралды, – деп хабарлайды ШҚМУ-дың баспасөз қызметі.

Сондай-ақ, оқу орнына соңғы жылдары студенттердің көптеп түсуіне орай Психология, педагогика және мәдениет факультеті қайта құрылып, ішінен Өнер және мәдениет атты жаңа факультет ашылуы да ықтимал.

Атап өтерлік тағы бір жайт – университет С. Аманжоловтың 115 жылдық мерейтойына қызу дайындық үстінде. Осы шараға байланысты көптеген ауқымды іс-шаралар ұйымдастырылады. Мұнымен қоса, ЖОО мұражайы жаңа жәдігерлермен толықтырылып, мұражайдың виртуалды нұсқасы да жасалмақ.