QS World University Rankings әлемдегі үздік университеттерді бағалау рейтингі 2004 жылдан бері жүргізіліп келеді. Қазақстандық жоғары оқу орындары бұл рейтингке 2011 жылдан бері қатысуда,- деп хабарлайды Altainews.kz тілшісі ҚР Ғылым және жоғары білім министрлігіне сілтеме жасап.

Соңғы төрт жылда QS рейтингінде көрсетілген қазақстандық ЖОО-лардың саны екі еседен аса өсті, ал соңғы үш жылда 14-тен 21 университетке дейін жетті.

Пәндік рейтингтерде де қазақстандық университеттердің көрсеткіші айтарлықтай артты: соңғы төрт жылда 2-ден 8 университетке дейін өскен.

QS Sustainability Rankings тұрақты даму мақсаттарына қол жеткізудегі әлемнің үздік университеттерін қамтиды. Бұл рейтингтің соңғы шығарылымында бірден 12 қазақстандық университет «Басқару моделі» индикаторы бойынша жоғары нәтижелер көрсетіп, өз орнын тапты.

QS Stars бағдарламасына қатысушы қазақстандық университеттер саны да соңғы үш жылда 22-ге дейін өсті, бұл елдегі жоғары білім сапасының артып келе жатқанын айғақтайды.