Бүгін Алтай ауданының Феклистовка ауылында «Ауылдық денсаулық сақтауды жаңғырту» бағдарламасы аясында жаңа медициналық пункт ашылды. Ауыл тұрғындарының айтуынша, соңғы 40 жылдан бері мұнда жаңа әлеуметтік нысан салынбаған,- деп хабарлайды  Altainews.kz  тілшісі. 

Ашылу салтанатына арнайы келген облыс әкімінің орынбасары Ербол Нұрғалиев ауыл тұрғындарын осы маңызды оқиғамен құттықтап, игі тілегін жеткізді.

Медициналық пунктте медбике қызмет атқарады. Серебрянск қалалық ауруханасының бас дәрігері Сәтбек Борбасовтың айтуынша, аптасына бір рет педиатр мен жалпы тәжірибелік дәрігер кезекпен келіп отырады. Ауылдық округте 200-ден астам тұрғын бар, оның 51-і – балалар.

Құрылыс жұмыстарын шілде айында бастаған «CEO Group» ЖШС мердігерлік ұйымы атқарды. Медпункт электр жарығы өшкен жағдайда дизельді генератор арқылы үздіксіз жұмыс істейді.

Медициналық пункттің айналасын абаттандыру үшін тротуар плиткалары төселіп, газонға орын дайындалды.

Ел Президентінің Жолдауына сәйкес, «Ауылдық денсаулық сақтауды жаңғырту» пилоттық ұлттық жобасы аясында 2023-2024 жылдары Шығыс Қазақстан облысында 36 медициналық нысанның құрылысы жоспарланған.