Бүгінгі қоғамдағы ең қадірлі, ең көне, ең күрделі, ең қауіпті мамандықтың бірі – ол құрылысшы мамандығы. Соған орай елімізде 12 тамыз – құрылысшылар күні ретінде белгіленген. Кеше облыстық драма театрда осынау мамандық иелерінің құрметіне салтанат ұйымдастырылып, озат құрылысшылар марапатталды. Шараға облыс әкімі Даниал Ахметов қатысып, қадірлі мамандық иелерін құттықтады.

Кәсіби мерекеге арналған жиын құрылысшыларға арналған фильммен басталып, онда аймақтың ажарын кіргізген ірі жобалар, ауқымды құрылыстар жиналғандар назарына паш етілді.

– Барлық өмір осы құрылысшылардан басталады. Зауытты, мектепті, аурухананы салатын кімдер, ол құрылысшылар. Ең алғашқы баспанаңызға қол жеткізген жүрекжарды қуанышыңыз есіңізде ме? Оны сыйлаған кім? Тағы да осы құрылысшылар. Адамзат пайда болғанда не істеді, ең алдымен өзіне баспана салды. Әлемдегі ең зәулім де әсем ғимараттар осы құрылысшылардың қолымен тұрғызылды. Сондықтан адамзатқа тек қана қуаныш сыйлайтын ең көне мамандық иелері күнімен баршаңызды шын жүректен құттықтаймын! Дендеріңізге саулық, амандық, қызықты да бақытты өмір тілеймін!, - деген аймақ әкімі өзі де ең алғашқы еңбек жолын Павлодар, Екібастұз қалаларында құрылысшы, прораб, учаске бастығы ретінде бастағандықтан, бұл мамандық әрқашан жанына жақын екендігін, өзіне үнемі қуаныш сыйлайтындығын жеткізді.

Бұл кеште бір топ шығысқазақстандықтар Инвестициялар және даму министрлігінің «Құрметті құрылысшы» төсбелгісімен марапатталды. Алғашқы төсбелгі салтанатты жағдайда аймақ басшысы Даниал Ахметовке тапсырылды. Төсбелгіні министрліктің атынан облыс әкімінің орынбасары Серік Ақтанов табыс етіп, облыс әкімінің өңірдің құрылыс саласындағы «Нұрлы жол» саябағы, «Қарағайлы», «Абай Арена» секілді жарқын да ірі жобалары үшін ел атынан алғыс білдірді.

Сондай-ақ, мұндай төсбелгіге «ПМК Құрылыс» ЖШС бас инженері Нұрахмет Кеңесов, «Нұр Отан» партиясы облыстық филиалының бөлім меңгерушісі Аманбай Нүркенов, «Фирма Азия» ЖШС прорабы Амантай Мұстаханов және осы ұжымның учаске басшысы Геннадий Фетищев лайық деп танылып, сахна төрінде құрмет көрсетілді.

Бұдан бөлек өңірдің құрылысында лайықты қолтаңбасын қалдырып жүрген біраз азаматтар облыс әкімінің Құрмет грамотасымен атап өтілді. Олардың қатарында «Фирма Азия» ЖШС директоры Сәуле Досқожанова, «Элхон-Строй» ЖШС басшысының орынбасары Бауыржан Дүсіпов, «Күршім құрылыс» ЖШС директоры Қуаныш Қарсыбаев, «Мемсараптама» РМК басшысы Ержан Текебаев, «Ремдор» ЖШС директоры Бауыржан Камзинов және тағы басқалар бар.

Салтанатты кеш облыс өнерпаздарының мерекелік концертіне жалғасты.