Семей қаласындағы Шәкәрім атындағы мемлекеттік университетінде 18 жылдық тарихы бар Семей дебат қозғалысына үлкен серпіліс әкелген «Конгресс» интеллектуалды дебат клубының ұйымдастыруымен «Рухани жаңғыру» бағдарламасы аясында Шәкәрім Құдайбердіұлының 160 жыл толуына орай дәстүрлі «Kongress cup V» Республикалық пікір-сайыс турнирі өтті.

Екі күнге созылған додаға Қазақстанның әр түкпірінен келген жалпы саны 40-қа жуық фракция қатысып, өз араларында кіл мықтыларды анықтады. Тартысқа толы өткен турнирдің іріктеу және финалдық ойындары Британдық Парламенттік форматында (БПФ) ойнатылды.

Сөзді бірде салқындатып, бірде оттай жалындатып, тапқырлықпен сөз суретін салған қатысушылар турнирдің бірінші күні БПФ форматында «Б.П Киберспортқа тыйым салады», «Б.П БҰҰ-ның жанынан бейтарап әлем әскерін құру керек деп есептейді» деген сынды тағы да басқа көптеген тақырыптарды талқыласа, ал дүбірлі жарыстың екінші күні Американдық Парламенттік Форматында «Қазақ футболының дамуы үшін балалар академиясын қалыптастырудан қарағанда, футбол мамандарын даярлайтын мектепті қалыптастырған тиімдірек», «Б.П Ирак мемлекетінің тарих сахнасында пайда болғанына өкінеді» деген қараларға өздерінің идеялары мен тың ойларын білдіре отырып, финалға шығуға бар күштерін салды.

Жарыстың қорытындысына сәйкес, Астана қаласының намысын қорғаған «Тanos» фракциясы Сабыржан Тілебалды мен Әділжан Тұрсынбек жеңіс тұғырының ең биік сатысына көтеріліп, кубокты қанжығаларына байлады. Ойнау стильдерімен ерекшеленген қаламыздағы «Салауат» зияткелік пікір-сайыс ордасының жас буындары Ұлағат Өмек пен Мадияр Абдикамалов ІІ орынға лайық деп танылса, Астана шаһарынан келген «Жеті жарғы» ИДК-ның пікірсайысшылары Рахим Шахзадаев пен Абылай Боранбай үздік үштікті қорытындылады. Сонымен қатар, төрт раундтың көрсеткіші бойынша ең жоғары ұпай жинаған 16 спикер арасында Линкольн-Дуглас (ЛД) форматында үздік өнер көрсеткен Сабыржан Тілебалды «Ең үздік спикер» номинациясын жеңіп алды.