Оқытушыларды электронды оқулық жасауға үйретпек
Елбасы Нұрсұлтан Назарбаев «Төртінші өнеркәсіптік революция жағдайында дамудың жаңа мүмкіндіктері» атты биылғы Жолдауында жоғары оқу орындарындағы ғылыми бағыттарды дамытуды, ІТ-технологияларды зерттеуге басымдық беруді, сонымен қатар, жоғары білім саласында ақпараттық технологияларды меңгерген түлектер санын ұлғайтуды атап көрсеткен-ді.
Осыған орай С. Аманжолов атындағы ШҚМУ-да университетке арналған ІТ-технологияның жаңа түрі – электронды оқулықтарды құрастыру қолға алынды деп хабарлайды білім ордасының баспасөз қызметі.
– Елбасы Жолдауда ІТ-технологияларға басымдық беруді, ақпараттық технологияларды меңгерген, жасанды интеллектпен және «ауқымды мәліметтермен» жұмыс істеуге машықтанған студенттер дайындауды атап көрсетті, – дейді модульдік бағдарламаның авторы, ақпараттық-коммуникативтік технологиялар департаментінің инженер-бағдарламашысы К. Веригина.
ШҚМУ-да алғаш рет «Электронды оқулықтар жасау» курстары өтеді. Оның міндеті – оқытушыларды «Электронды оқыту» бағдарламасымен жұмыс істеуге үйрету.
– Курс тыңдаушылары SCORM 2004 HTML форматында электронды оқулықтарды өздері әзірлеп, жариялай алатын болады, – дейді К. Веригина.
Курстар 18 қаңтардан 19 сәуірге дейін жүрмек. Атап өтерлігі, университет оқытушылары жаңа курсқа асқан белсенділік танытуда, қазірдің өзінде 16 адам курсқа жазылып үлгеріпті.