«Нұр Отан» партиясының облыстық филиалының ұжымы республикалық «Үздік бастауыш партия ұйымы» мен «Үздік қоғамдық қабылдау бөлмесі» байқауында жеңімпаздар қатарынан көрінді.

Тәуелсіздік күні мерекесі қарсаңында «Нұр Отан» партиясының аймақтық және аумақтық филиалдары арасында өткен «Үздік бастауыш партия ұйымы» және «Үздік қоғамдық қабылдау бөлмесі» республикалық байқауының жеңімпаздары анықталып, Астанада, партияның орталық аппаратында салтанатты марапаттау рәсімі өтті.

Аталған байқау 2010 жылдан бері үздіксіз ұйымдастырылып келеді. Мұны халықпен бетпе-бет кездесіп, қоян-қолтық жұмыс атқарып отырған қоғамдық қабылдау бөлмелерінің бір жылдық жұмысына баға беру деуге де болады. Биылғы «Үздік қоғамдық қабылдау бөлмесі» республикалық байқауына барлығы 231 қоғамдық қабылдау бөлмесі қатысқан. Соның ішінде аймақтық филиалдар арасынан І-орынды Алматы қалалық филиалы, ІІ- орынды Шығыс Қазақстан облыстық филиалы, ІІІ-орынды Солтүстік Қазақстан облыстық филиалы жеңіп алды.

Атап айтар болсақ, жеңімпаздарды анықтау үшін құрылған арнайы комиссия азаматтардың өтініштерін қарау мерзімінің сақталуы мен оның нәтижесін, оң шешілген өтініштер үлесін негізге алды. Сонымен қатар, азаматтарды жеке қабылдауды ұйымдастыру және өткізу сапасы, «Электрондық қоғамдық қабылдау бөлмесі» бірыңғай ақпараттық жүйесінде енгізілген деректердің толықтығы мен дұрыстығы, аумақтық және аймақтық партия филиалдарының қоғамдық қабылдау бөлмелерінің жұмыс жүктемесі, бұқаралық ақпарат құралдарында қоғамдық қабылдау бөлмелерінің жұмысын насихаттау, азаматтардың өтініштерін шешуге бағытталып енгізілген жұмыстың жаңа нысандары мен тың әдістері ескерілді.

Ал «Үздік бастауыш партия ұйымы» болып өңірдегі «Казцинк» ЖШС-нің бастауыш партия ұйымы танылды. Жеңімпаздарды партия төрағасының бірінші орынбасары Мұхтар Құл-Мұхаммед пен орталық байқау комиссиясының мүшелері, Парламент Мәжілісінің депутаттары Шавхат Өтемісов және Ерсұлтан Бектұрғанов құттықтап, І, ІІ, ІІІ дәрежелі дипломдар мен ақшалай сыйлықтар табыстады.