Өскеменде «Ақбұлақ» мемлекеттік бағдарламасының аясында қанатқақты жоба қолға алынды. Енді «Өскемен су арнасы» кәсіпорнының мамандары кәріз жүйесін герман технологиясы арқылы тазалайтын болады.

Ағымдағы жылы «Нұрлы жол» бағдарламасы аясында Байбатчина көшесіндегі №30 ауа сорғыш станциясына күрделі жөндеу жұмыстары жүргізілуде. «Өскемен су арнасы» МҚК-ның басшысы Ержан Әубәкіровтың айтуынша, жобаның жалпы құны 275 миллион теңгені құрайды.

– Биыл қалалық жолаушылар тасымалы және автомобиль жолдары бөлімінің басшысы «Қазқұрылыссервис-7» мердігер компаниясымен келісімшарт жасады. Нәтижесінде, облыстық бюджеттен қаржы үнемделді. Себебі, бұрын кәріз жүйелерін тазалау үшін жерді қазып, асфальтты қопаратын едік. Енді шетелдік технологияның арқасында бұл жұмыс әжептәуір жеңілдеді, - дейді Ержан Әубәкіров.

Өткен жылы Өскемендегі кәріз жүйелерінің 28,6 пайызы апаттық жағдайда болған. Осы орайда, 2015-2016 жылдары қаладағы Тәуелсіздік даңғылы, сондай-ақ, Айтықов, Машиностроителей және Вокзальная көшелеріндегі су құбырларына жөндеу жұмыстары жүргізілгенін айта кеткен жөн.

Рейд барысында «Нұр Отан» партиясы облыстық филиалының кеңесшісі Аманбай Нұркенов барлық жұмысты уақытында өткізу қажеттігін ескертті.

– Егер техникалық жағынан қандай да бір қиындықтар орын алса, бірлесіп шешуге дайынбыз. Тек жұмыстар нәтижелі жүргізілсе болғаны, - дейді Аманбай Нұркенов.

Ажар Сағатбекова