Облыс орталығындағы Металлургтердің мәдениет сарайы алдындағы Тарбағатай ауданының мәдени күндері әдеттегідей жәрмеңкемен басталды. Сауданың көрігін қыздырып жатқан қарақұрым халық ортасына облыс әкімінің орынбасарлары Ермек Көшербаев пен Владимир Кошелев келіп, аралады, деп хабарлайды Аltaynews.kz тілшісі.
Аудан әкімі Ділдәбек Оразбаев қала тұрғындарына 11 тонна ет, үш тонна балық, 500 литр қымыз, 3 центнер құрт, 150 келі сары май және нан-тоқаш өнімдерінің бірталай түрі арзан бағамен жеткізілгенін айтты. Жәрмеңкеде сиыр мен қой еті – 900-1000, жылқы еті – 1200 теңгеден саудаланды. Оған ауданның 17 ауылдық округімен қатар, тауар өндірушілері тайлы-таяғына дейін қалмай, түгел келген екен.
– Біз биыл бірінші рет көкөніс мәселесін жолға қойып отырмыз. Келесі жылы мемлекет тарапынан бөлінетін нақты қаражатқа аудандағы барлық су тоғандарын жөндеу-ден өткізбек ойдамыз. Мәселен, міне, жанымызда тұрған Құмкөл ауылдық округінің тұрғыны Сенбіхан Болысхан 2007 жылдан бері көкөніс өсіріп келеді. Ендігі жерде оның несие алуына жәрдемдесіп, томат цехын ашуына қол ұшын беретін боламыз, – дейді аудан әкімі.
Ата жұртқа келген қандасымыз өсірген бау-бақша өнімдерінің бағасы да көңілге қонымды көрінді. Оның қарбызы 25, қауы-ны 100, ал қызанағы 40 теңгеден саудаланып жатты.
Тарбағатайлықтар базаршылап келген халықтың рухани демалысын ұтымды ұйымдастыруды да басты орынға қойыпты. Мәселен, аталған алаңда Қазақстан Суретшілер одағының мүшесі, аудандық балалар өнер мектебінің директоры, «Бейнелеу өнері» аталымы бойынша облыс әкімі сыйлығының иегері Әлібек Шоқановтың «Күрең күз» атты суреттер көрмесі ұйымдастырылыпты. Қылқалам шеберінің «Тарбағатайдағы той», «Балдәурен», «Шыңғыстай», «Бозша ауылы», «Сеңгір жазығы» және басқа да туындылары ешкімді бейжай қалдырмай, оларды сатып алушылар да табылды.
– Менің көптеген топтамаларым туған жерге байланысты жазылған. Мақсатым – Тарбағатайдың тамаша келбетін көпшілікке жеткізіп, облыс көлемінде таныту, – дейді суретші.
Көрмеге сондай-ақ, балалар өнер мектебі оқушыларының қолөнер туындылары және зергер-дизайнер Серік Бәшеровтің туындылары қойылыпты.
Той-базарда тарбағатайлық өнерпаз қауым қойған концертке де көпшілік риза болысты. Бұған қоса көпшілік алдына сайдың тасындай жігіттер шығып, қошқар көтеруден бақ сынасты. Дегенмен, мықтының аты қашанда мықты екен, зайсандық Қуанышбек Қиарыстанов қошқарды 110 рет көтеріп, соңында оны үйіне алып әкетті.
Нағыз думан кешкісін «Үлбі» мәдениет сарайында басталды. Онда Қазақстан Республикасының еңбек сіңірген әртісі Майра Ілиясова, Қазақстанның мәдениет қайраткері, Президент оркестрінің әншісі Клара Төленбаева, дәстүрлі әншілер Ержан Шүкіманов, опера әншілері Болат Қанаға-тов, Дархан Жолдыбаев, айтыс ақтангерлері Сара Тоқтамысова, Абаш Кәкенов, Серікхан Жақиянов өнер көрсетіп, халықты риза етті.
Эльмира Тайырқызы
