Аудандық жұмыспен қамту орталығының мәліметіне қарағанда, былтыр Катонқарағай өңірінде «Жұмыспен қамту - 2020» бағдарламасы бойынша 62 адамға 154,5 миллион теңге несие берілген, деп хабарлайды Аltaynews.kz тілшісі.

Соның ішінде, мал шаруашылығын дамытуға 58 адамға 142,5 миллион, ара шаруашылығымен айналысуға 3 адамға 9 миллион, кулинарлық қызмет үшін 1 адамға 3 миллион теңге берілген. Осының арқасында ауылдарда жаңа жұмыс орындары ашылып, жергілікті жұрттың әл-ауқаты артып келеді.

Мәселен, белқарағайлық Роза Сванова 4 миллион теңге несиеге Сөгір ауылының қасынан өтетін республикалық Өскемен-Рахман қайнары тас жолының бойында дәмхана ашты. Бұған қоса, қымыз өндіріп, жылқы және мүйізді ірі қара санын көбейтуде. Сол сияқты үштөбелік Жұмабек Қалиев 3 миллион теңге несиеге 7 бас жылқы, 10 бас ірі қара сатып алып, мал шаруашылығымен айналысуға ден қойса, үлкеннарындық Рашид Смағұлов та осынша мөлшердегі несиеге омарта шаруашылығын дамытып отыр. Келтіре берсек, мұндай мысалдар ауданда жетерлік.