Шемонайха ауданында «Көкжал бетон» ЖШС асфальт дайындау зауыты іске қосылды. Кәсіпорын Украинадан жеткізілген заманауи қондырғылармен жабдықталған, деп хабарлайды Аltaynews.kz тілшісі.

Жұмысы компьютерге негіздел-ген зауыт толық қуатына көшкенде тәулігіне 600 тонна өнім дайындайды. Бұл шамамен 700-800 метр жолды қамтуға жетеді.

25 тонналық жүк көлігіне тиелген алғашқы асфальт осы ауданда салынып жатқан мектептің құрылысына жөнелтілді. Жалпы, бұл білім ошағына 1 мың тоннадай асфальт керек екен. Бұған қоса Верх-Уба ауылының жолына 1140 тонна, Шемонайха қаласындағы Астафьев көшесіне 1 мың тонна және басқа да жолдарға төсеуге «Көкжал бетонның» шикізаты пайдаланылмақ.