Өскемен қаласында Астана қаласының туған күнін тойлау веложарыстан басталды. Оған 70-тен астам адам қатысты.
Салауатты өмір салтын насихаттау және тұрғындарды бұқаралық спортқа тарту мақсатында ұйымдастырылған шараға негізінен өскемендіктер қатысты.
Веложарыстың ең жас қатысушысы Мирсұлтан Бергалиев 8 жаста. Ол осымен 3 жыл қатарынан велоспортпен айналысады, сонымен қатар таэквондоға барады. Ол жарысқы әкесі Ғаббас Берғалиевпен келіпті. Әкесі мен ұлы спортты жанұя ретінде арнайы сыйлыққа ие болды.
Веломарафонның ең жасы үлкен қатысушылары Рашит Мұхамеджанов пен Әділғазы Әлімбеков. Зейнет жасына қарамастан бұл кісілер мәреге еш шаршамастан, топтың бел ортасында жетті.
-Өзімнің осы жарысқа қатысуымды Президентке арнаймын, -дейді Әділғазы Әлімбеков. Жарысқа қатысушылардың кәнігі спортшы еместіктері олардың шаршаңқыраған түрлерінен байқалып тұрды. Соған қарамастан олардың жүздері шаттыққа толы еді.
Велоспорттың жеңімпаздары бағалы сыйлықтармен марапатталды.